Juyaimi, tucuimanda yali ashtahuan ali

 

 

1 Shuj gentecunapaj rimaicunapi, angelcunapaj rimaicunapi ñuca rimajushpapash, juyaita na charishpaca, tsilin nijuj jirrushna, na cashpaca címbalo nishca huacajunshnami uyarijuiman. 2 Dios ima nishcata villajushpapash, pipash na yachashcata tucuita yachashpapash, imatapash ninanda yachajushca cashpapash, shinallata urcucunata shujmanda shujman yalichingapaj, tucui shunguhuan crij cashpapash, juyaita na charishpaca, imapash na canichu. 3 Imagutapash na charijcunaman micunata charichun, ñuca charishcacunata tucuillata chaupishpa carajushpapash, shinallata ñuca cuerpota ninapi rupachijuchun saquishpapash, juyaita na charishpaca, imapajpash na ali cahuanllu.

4 Juyaita charishpaca, llaquita apanllami, shujcunatapash llaquinmi. Juyaita charishpaca, shujcuna imata charijtapash, ñucapaj cashcanman yashpaca na ricunllu. Juyaita charishpaca, na ñucami ashtahuan ali cani ninllu, na jariyanllu. 5 Juyaita charishpaca, na imatapash pinganayaita ruranllu, na paipajlla alita mascanllu, na ñapash fiñarinllachu, na fiñashcalla causangapaj munanllu. 6 Imatapash cashcatapacha na rurajpica, na cushijunllu. Ashtahuangarin na llullashpa aliguta rurajpimi cushijun. 7 Tucui llaquita apanllami, tucuita crinllami, tucuita shuyanllami, ima nalita rurajpipash saquinllami.

8 Juyaica, ima horapash na tucurinllu. Ashtahuangarin Dios ima nishcata villashcapash tucuringami. Shuj shuj rimaicunata rimanapash, na ashtahuan tiangachu. Imata yachajunapash tucuringami. 9 Cunambica, ashatallami rijsinchi. Ashatallami, Dios ima nishcataca villanajunchi. 10 Ashtahuangarin ima pandatapash na rurana chayamujpimi, chai ashatalla yachashcapash tucuringa.

11 Ñucaca, huahuara cashpaca, huahuashnami parlarcani, huahuashnami yarijurcani, huahuashnami maitapash rurangapaj munarcani. Ashtahuangarin ña runa tucushpaca, huahuashna causanataca saquircanimi. 12 Cunambica, espejopi ñavita ricurishpa, chingaj chingajlla ricujunshnami ricunajunchi. Ashtahuangarin chai punllapimi, ñavi ñavi ricunajushun. Cunambica, ashatallami yachani. Ashtahuangarin Dios imashna ñucata rijsinshnallatami, chai punllapica aliguta rijsisha. 13 Cunanga crinapash, shuyanapash, juyaipash tiangallami. Cai quimsamanda ricujpica, juyaimi ashtahuan yali ali tian. (1 Corintios 13).

Comentarios
Por | 2017-01-29T18:16:39+00:00 28 enero, 2016|Uncategorized|

About the autor: