Cruzta aparinamanda (Mr. 8:31‑38)

Cruzca, na juyailla ricuringapajchu, ashtahuangarin ninan llaquita apashpa Apunchi Jesús huañuchi tucushcatami ricuchijun. Apunchi Jesusca, chacatarishpa huañushca quimsa punlla jipa, causarinata yacharcami. Pundaca, Israel llactata mandanajuj rucucuna, ninan charijcuna, shinallata curacunata mandaj curacunapash, Moisés mandashca shimicunata yachachij runacunapashmi Paitaca huañuchirca. Chai charij runacunaca, huajcha gentecuna Jesusta juyashpa catinajujpi envidiata charishpami, chacatashpa huañuchishca.

Ashtahuangarin Pedroca, Apunchi Jesustaca, causajuj Taita Diospaj Churimari capangui nishca jahuami “Taita Dios ama chashna munashca cachun” nirca. Apunchi Jesús nishcata na ali yachashpami Pedroca, yanapasha nishpa Jesustaca ladoman pushashpa, shinlli tacurirca. Taita Diospaj munaitaca na yachaimandami shina nijurca.

Shinamandami Apunchi Jesusca, paitaca: Ninanda tacurishpa cashna nijurca: “¡Satanás, ñuca ñaupajmanda anchuri!, canga Taita Dios imata pactachigrijujtaca na yachanguichu. Ashtahuangarin gentecuna imata yarijujtallami nijungui” nircami.

Apunchi Jesusta na catingapaj munashpa, llaquita apanata manllaj gentecunaca, na jahua pachaman ringachu (Ap. 21:8).

Shina cajpimi Apunchi Jesusca tucuilla gentecunaman, Paipaj yachajujcunamambash shina yachachijurca.

Ñucanchi causaitaca na llaquishpami “Apunchi Jesusllami quishpichin” nishpa villana canchi.

Apunchi Jesucristota catinamanda yachangapajca, caicunatami yachana capanchi:

  1. Na ñucanchipajlla ima alita mascanachu canchi, ashtahuangarin Taita Diospaj munaita mascashpa pactachishpami, Paitaca cushichishpa causana canchi. Pabloca, “Timoteotallami charini, shujcunaca, paicunapaj alitallami mascanajun” nishpami quillcashca (Fil. 2:20). Paipaj causaimandapash cashnami nirca (Fil. 3:7‑21).
  1. Apunchi Jesusta tucui shunguhuan catishpa paimanda villajujpica, ñucanchita nalicachinmi, tacurinajunmi. Apunchi Jesusmi ñucanchiman shuj juyailla ejemplota ricuchijurca (1 Ped. 2:20‑23) (4:12‑16). Moisespash alipacha crij cashpami, chashna aliguta causajushca (Heb. 11:24‑27). Cristota ricujunshnami causana capanchi (Heb. 12:2‑8).

Taita Diosca ñucanchitaca, Paipajlla causashpa, Paiman rijchajcuna cachunmi munan (Heb. 12:10b‑11). “Ñucanchi cuerpopi llaquita apajushpami, juchata ruranataca saquinchi (1 Ped. 4:1‑5). Taita Diostaca “ñucanchi cushijuihuan llaquicunata apachun ushaita carahuai” nishpami mañana canchi (Rom. 5:3). Na Apunchi Jesusta crishpalla causanachu canchi, ashtahuangarin llaquicunatapash apanallami capanchi (Fil. 1:29).

  1. Punllandi cruzta japishpami, Jesusmanda llaquita apanalla canchi. Ñucanchi quiquin mauca causaihuanmi, punllandi macanajushpa causanajunchi (Gál. 2:20, 6:14). Cristohuan ña chacatai tucushca cashpami, crijcunaca ña mana cai pachapi ima tiashcacunata ninanda munashpa causanajunchi (1 Jn. 2:15‑17). Ashtahuangarin Apunchi Jesús ucha tigramunata shuyashpami, Paipajta rurashpa causana canchi (1 Jn. 2:28‑29).

Cunanga Cristohuan causarishpa, mushuj causaigupimi causanajunchi (Rom. 7:5‑6). Diospaj Espiritupaj ushaita shungupi charishpami, Jesuspaj mushuj causaiguta charinchi. Shina cashpami paita tucui shunguhuan juyashpa, Paiman rurashpa causanajunchi.

Apunchi Jesucristomi, Satanastapash, ima nali yuyaitapash mishai ushachun ushaita caramujun (Sant. 4:7, 5:7‑8). Shinallata Apunchi Jesús tigramunata shuyashpami taucacunata Diosman pushashpa catina canchi, Pai shamushpami caranacunata cusha nijun (Mt. 5:10‑12).

Comentarios
Por | 2015-10-22T11:36:21+00:00 21 octubre, 2015|Uncategorized|

About the autor: